Ci ittoi l’IMU e i pisci abbuccaru

L’autra sira ,a l’ura chi cumincia a calari u sonnu,a genti si ittau nte

stradi,chi machini,chi motocicletti,chi bicicletti e macara chi lapi pi

fari buddellu.

Sunaunu i claxon,i trummetti,i friscaletti e svintulaunu

banneri dill'Italia e banneri russi e niri.

Ma cu erunu chisti?Vinciu u Milan?

No. Erunu chiddi du PDL chi smanianu pa cuntintizza chi “Iddu” avia luvatu   

L’IMU.

L’avia prumittutu prima di l’elezioni e mantiniu a parola,

picchì “Iddu” è un omu d’onori.

Sa vulemu cuntari tutta, aprennu parentisi, avia dittu chi ritunnava arreti 

i soddi  chi ni fici pagari du 'ngissatu di Monti,

ma u sapemu tutti chi era na scaciuna pi futtiri i cumpagni.

Chiusa parentisi.

Lettinu ciccoi cu tutti i so fozzi mi tira a codda.

Non cia fici.

Ca prima ciusciata vutoi all’anchi all’aria.

L’IMU a livaru pi tutti,tranni pi chiddi chi hannu i castelli e i villi di lussu,

(a trovili!, iaprennu e chiudennu n'autra parentisi).

I costruttori non hannu a pagari pi casi chi non rinisceru mi vinnunu.

In compensu u prossimu annu avemu a Service Tax, chi l' hannu a pagari macara l’inqulini.

Ficiru cridiri ca casa è sacra,a proprietà non si tocca, l’ugualianza na putemu 'nzunnari

e a giustizia è sulu pi cchiù fotti.

Ritunannu a “Iddu", na vota chi vinciu, vosi nu bellu sondaggiu

e dimustrau chi ora l'italiani u vonnu cchiù beni ancora.

Ci ittoi l’IMU e i pisci abbuccaru n’autra vota.

Pari cu celu è bellu pulitu ,ma si sta vutannu un gran malutimpuni.

Unnè chi rriva acqua, lampi, trona ragnola e na gran trumma d’aria 

chi scupecchia tutti l’attarini.

Ca semu.

A comu voli Diu.

Donnantoni sbagghiau: Nta Siria u gas non è nervinu.

E' sarinu.