L'oculista pacciu

Si trova a Livanti fra Turchia, Giordania, Israeli, Libanu e Irak.
E' china i storia e cultura, ci passaru fenici, romani, mammalucchi
(chi non sunnu babbi) e puru i francisi.
A Siria,dopu a secunna guerra mondiali divintoi indipendenti e, pottunu passari deci anni,
chi cadiu nte manu da Famigghia Assad.
Iddi erunu musulmani alauiti e cu era di sta religioni
pigghiava i megghi posti.
Macara sunniti, sciiti e pi primi cattolici e ortodossi foru rispettati.
A bonamma di Hafiz cumannoi cu prepotenza picchì avia u pattitu Bath e
l' esercitu chi supra aerei, carrammati e missili avia a stidda russa.
U so guvennu fu bellu femmu.
Cettu, ci foru na picca di stragi, na para i taccaru e na picca i  littri i censuraru.
Appi u tempu mi si 'faccia 'nto Libanu chi so suddati e ci firi ghiuttiri a so paci.
Quannu 'nto dumila muriu,appunu a chiamari du bracilittuni di so
figghiu Bashar,chi facia l'oculista a Londra.
Chistu prima non ni  vulia sapiri di fari u dittaturi, poi u pasceru ca cucchiaredda e si
'nsignoi bonu.
Non l'avissiru mai fattu.
Cumincioi a fari u scattru e a mazzari genti pedi pedi.
'Nto dumila e cinqu fici sautari 'nta l'aria cu na bumma
a machina du Presidenti du Libanu Hariri, u chiapparu subutu e
sappi arricogghiri baratti e barattelli e lassoi comu un braciulittuni u paisi.
Non sapennu a quali santu prigari,si taccoi mani e pedi,cu l'Iran,
cu l'hesbollah e cu Putin e si mintiu a tutti l'autri contra.
Quannu 'ruvau a Primavera Araba si scantoi tantu chi non putia vidiri
mancu i carusi fari buci 'nta strada.
I notizi 'ruvaunu dill' Egittu, da Tunisia,di tutti i patti e i cristiani cuminciaru a protestari.
Bashar trimava comu na fogghia i canna.
Cumincioi a sparari di Damascu a Homs.
A Aleppu i città  divintaru un campu i battaglia e i
campusanti non bastaunuu 'chiù.
U pacciu, chi oramai s'avia giucatu a grazia di Diu,
pi manteniri a so siggiazza i dittaturi fici na stragi cu gassi
nervinu e puru i carusi vistunu a motti cu l' occhi.
I ciddazzi chi svulazzaunu supa e cadaviri si pigghiaru 
Patri Dall' Oglio chi 'nta sta terra matturiata avia fattu un monasteru unni si
putiunu mischiari preghieri e religioni.
Videmu si una di sti preghieri po fimmari stu
pacciu di Bashar.

U Nilu cala russu di sangu

Ommai non si cuntunu cchiù i motti,hannu i panzi bucati chi budedda

i fora,i iammi rutti,i testi spaccati,i cori spunnati,i mani nsanguliati;

in Egittu stannu facennu na carneficina.I frati Musulmani non sa

sinteru a passari chi ittaru fora du Palazzu e iammarru l’opra.

U generali Al Sissi,prima l’avvirtiu e poi ci sparoi senza pietà,ca polizia,

chi suddati,chi civili,di sutta,di latu, e puru i supra cu l’elicotteri.

Nto paisi di Farauni non si reggi cchiù.

Nte casi,nte stradi,nte ghiazzi,supral’autubussi,supra i treni  

i genti si sciarriunu e subutu venunu e mani picchì

si uno è cu Al Sissi, l’autru e cu Morsi.

Nto menzu ristoi sulu El Baradei chi si dimittiu.

A Rivoluzioni l'avia fattu priari a tutti e poi ristoi 

'mpantanata nto mari i fangu e u Nilu oramai cala russu di sangu.

Obama nonsapi cchiù chi pisci pigghiari:

l’Egittu si stra sfracillannu,nta Siria sicummatti casa pi casa 

e c’è sempri a bumma atomica da Palestina chi

menzamà scoppia succedi a fini du munnu.

Cettuni pensunu chi quannu erunu figghioli era sempri cchiù bellu

diciunu chi era megghiu lassari Mubarrak,ammenu c’era l’oddini.

Ma nta L’Egittu u problema non fu a democrazia ma i frati Musulmani,

chi non si cuntintaru di guvinnari,

appuru canciari tutti cosi mi ritunnaunu all' era da petra,

cuannu c'era u sultanu.

A Religioni  avia divintari leggi e i fimmini s’aviunu stari intra 

mi si fannu a cosetta. 

A strada difficili da democrazia si femma quannu ci cadi i supra a muntagna du Fascismu,

o cacchi autra fitinzia.

Nta politica,cetti voti,ci sunnu malintenzionati chi fanni finta di

partecipari all’elezioni,ma quannu vinciunu pensunu chi ponnu fari chiddu chi vonnu 

e di tutti l’autri si ni futtunu.

Ogni vota chi succedi, i cristiani si spattunu in due

e nasciunu odiu e disprezzu.

Ni sapemu cacchi cosa nto nostru Paisi,

unni Silviu, pi l’”amici” u Fradiciu,si misi nta testa c'ava canciari tutti cosi

e n'ava fari divintari a so immagini e sumiglianza.

E nto menzu a tuttu stu schifiu, d'autru cretinu di Bondi

voli

a guerra civili.

L’aviunu taccari, inveci u mazzaru

A Riva Liguri, 'nto parcheggiu du supermercatu, Kais ci stava vinennu na dosi di droga o clienti quannu visti rivari i carabbineri.

U figghiolu ciccoi di scappari, ma struppicoi e cadiu.

I sbirri u pigghiaru,u carricaru supa a  machina e u puttaru nta casemma.

Già pinsaunu chi ci daunu a midagghia,sulu chi quannu u vadaru nta facci, ristaru comu i babbi. 

Du poviru dilinquenti non rispirava cchiù.

L’ambulanza u puttoi subutu o spitali,ma non c’era cchiù nenti i fari, a so ura avia rivatu.

Di “babbi” di carabbineri, mu tiniunu femmu ci aviunu strinciutu u pettu assai e ci aviunu fattu mancari l’aria.

Pi completare l'opera umanitaria, avvisaru a Sonia, da sfuttunata da mugghieri, “sulu” dudici uri dopu.

U procuratori Cavalluni dissi ca vita è sacra, chi non è possibili chi un cristianu, puru si è dilinquenti peddi a vita sutta l'occhi du statu.

Belli e sacrosanti paroli,sulu chi i fatti comu a chistu divintaru na catina i Sant’Antoniu.

I Stefunu ,i Federicu e tanti iautri fineru i so ionna sutta i mani di na leggi senza cori.

U misteri du carabbineri, du polizziottu è difficili e delicatu, cetti voti a rischiu di vita,ma s’avi fari cu rispettu, picchì arreti du passamuntagna d’un dilinquenti c’è sempriun cristianu.

Purtroppu 'nta sta società di soddi e di l’apparenzi, chiddi chi non cia fannu o vannu o stottu, sunnu cunsiderati scarti e si morunu non ni fa ne' cauddu ne' friddu.

Saria l'ura mi ni studiassimu a costituzioni unni parra d’uguaglianza, a cuminciari i chiddi chi travagghiunu ca leggi, si non vulemu divintari comu a Russia di du gran fascituni i Putin, unni regna l’oddini pi cchiù fotti e l’ingiustizia pi 'chiù mischini.