DECADI, MA NON CADI

Dum,dum,dum,dum.  Roma 27 novembri 2013,  17,43 a campana di Palazzu Madama sona  a mottu . “Iddu” decadiu.  U Cavaleri, ecsi Presidenti, Presidenti du Milan,  Massoni, Capu di Capi, Spiritu Santu, pa leggi Severinu non è cchiù senaturi da Repubbliaca Italiana. Un  leccu rumpiu u silenziu di l’aula, tantu fotti  chi pu contracoppu si rumperu i vitri du Senatu ,  i fimmini di Fozza Italia  scoppiaru a cianciri chi faciunu pena e subutu scapparu  pi nto camerinu e si visteru a luttu. A Santachè, a Comi, a Carfagna. A Gelmini , pi devozioni a papi si minteru u tanga niru e puru a Minetti  apri parentisi  chi d’abitudini non si menti nenti chiudi parentisi.”Iddu”, chi avi un ciriveddu tantu rossu chi non ci capi nta testa e du c…gg….i rossi a cussì ….., si sparoi …. un comiziu pi darici na picca di curaggiu a sti genti disperati, a prumittirci chi non li abbannunava mai e, si manzamaddiu ci succidiria cacchi cosa, ci saria Barbara chi sapi cumannari megghiu d’un masculu. Purtroppu nto paisi du mari e du suli,di scritturi e di poeti, c’è cu cridi apri parentisi e non sunnu picca chiudi parentisi chi ci po’ essiri cacchi d’unu cchiù scattru chi po’ risovviri i problemi, unu cu Signuri ci desi i doti pi cumannari supra di l’autri. Sta genti si non sunnu babbi di natura, ribbammineru cu tempu, picchì ci vinni dura affruntari  a realtà da vita e prefereru sognari a occhi aperti. Nto nostru casu sti cristiani, pi so sfuttuna,  si desunu mani e pedi a unu chi mbrogghi na fattu nta so vita cchiussai di fila di capiddi finti chi avi supra a testa, e a Magistratura non potti fari iautru chi cunnannarlu. Ora chi i procesi arrivaru a sintenza avemu du stradi, o facemu finta di nenti e lassamu libiru u pregiudicatu di fari chiddu chi voli,  o lassamu tanti figghi orfani di patri, e nta stu casu si ponnu dari sempri in adozioni.

I nostri vutazioni: 

• 0  a Putin chi voli dari sulu all’Italia i carusi russi in adozioni, picchì sulu ca è sicuro chi non finisciunu nte mani di ricchiuni.
• 10 a Taverna  picchì nto Senatu dissi supra a Bellusconi , chiddu chi pensunu a maggior parti dill’italiani.

GIULIA RISTOI E I STIDDI PONNU SPITTARI

 Nto paisi d' Ucraina ca ieri era Russia, stidda russa e fauci e matteddu, u partitu di liberali, di genti studiata e benestanti si misi a fari traficu nte ghiazzi e nte stradi di città contro u govennu chi fimmoi i trattativi pi trasiri nta Comunità Europea; a quantu pari preferiu u gas di Putin, all'euru e u culu rossu da Merkel. A Brusselli pi vinciri a pattita, appunu puru a felici idea di ciccari a liberazioni di Giulia Timuscenku, nte cacciri, picchì fimmina potenti e du contrapartitu. U Presidenti Ianukovic, mancu si si stricunu nda nterra, faria nesciri da puliciusa, l'unica chi ci po dari fastidiu nte prossimi elezioni; e  così , Gilulia, bionda e bona, resta intra e i stiddi dill'Europa ponnu spittari. L'Ucraini, chi parrunu russu, ma non sunnu cchiù comunisti, giocunu o giocu di tri catti, fannu finta chi vonnu trasiri nta Comunità Europea, così a Russia ci manna u gas a picca soddi, si catta u so ranu, e i mafiusi si fannu i vacanzi nte sò spiaggi du Mari Niru. Nto fra tempu l'ecsi pugili Vitali sta facennu ferru e focu chi voli vinciri l'elezioni du dumila e chinnici, voli ripetiri a Rivoluzioni Aranciuni, quannu arrivaru da Merica valigi di dollari e mastri di iammari l'opra chi vutaru tutti i cosi sutta supra ittaru u guvennu nterra e vinceru l'elezioni. Ma fu un focu di pagghia e , nta quattru e quattru ottu ritunnaru a cavaddu i soliti, e a povira Giulia, chi avia pigghiatu a cumannari finiu in galera. Tanti pinsaturi sperti si incunu a bucca di paroli comu libittà, diritti civili  e a manciari e u travagghiu  u mentunu di parti, così i cunti spissu non ci nquadrunu, picchì  u populu pigghjia pi n'autra menza. L' Ucraini vonnu essiri sicuri chi ponnu dumari a stufa nto vennu e si ni futtunu di trattati di libiru commerciu, così preferisciunu aviri un russu pi amicu, chi l'onori di fari parti di na Comunità speciale.

I nostri vutazioni: 

•  -1 all'onorevoli Comi, picchì fici ghiacciari u sangu nte vini quannu dissi chi i vittimi dill'alluvioni da Sardegna erunu maleducati.
  
• 1 a Grillu chi si intricoi nto problema di trasporti pubblici a Genova quannu iddu non sapi quantu fa unu cchiù unu

IOLANDA S'INCAZZOI E CUMMINOI UN MACELLO

I Filippini sunnu settemila isuli sutta all'Asia, quasi centu milioni di cristiani, tanta fami e picca ricchizzi. Iddi non hannu piggjiatu piddu, picchì  foru occupati pi troppu tempu di spagnoli, poi di miricani e, na vota liberati, ci capitoi puru a disgrazia du dittaturi Marcos e di da lodda di so muggheri Imelda chi spardaliava  i soddi du populu cattannu gioielli, vistiti, e scappi  apri parentisi,   n'avia mucciati cchiùssai di dumila para  chiudi parentisi. Nta stu paisi poviru, di campagnoli, piscaturi, di servituri, un iornu di chisti, senza mi era nvitata, arrivoi dda paccia di Iolanda, cu na nivvina  chi ci dava tanta fozza di tutti i diavuli du nfennu misi assemi. U ventu ciusciava a tricentu all'ura, u mari si iazzoi e si sdivagoi, l'acqua ntrasiu nta tutti i puttusa, i casi si sittaru e poi si cuccaru, l'abbiri bularu nta l'aria, i machini divintaru barchi. Dopu na picca di secunni i motti si cuntaru a munzedda, mentri i feriti muriunu piniannu. Chiddi chi camparu annaunu girannu pedi pedi, in cecca di affetti pidduti. Tantu fu
u straziu chi, di tutti i patti du munnu patteru aerii di midicinali, manciari, robbi  e i "dutturi senza frunteri " minteru mani subbutu. Mentri nte Filippini succidia u diluviu universali, a Varsavia si riunia  a Commissioni di l'Onu pi studiari i cambiamenti du Tempu; U prufissuri Sanu, chi era da pi cuntu du Presidenti Benignu Aquinu povirazzu, appena sappi chiddu chi avia succidutu nto so paisi, ribamminiu e  pi vintiquattruri  non mancioi e non mi miviu pu dispiaciri. Iddu era consapevoli, chi si puru  i tifoni ci hannu statu sempri,  ora sunnu sempri
cchiù potenti e cchiussai pi cuppa di l'omu, spinsarutu e strafottenti chi, pi fari a bella vita, brucia  cabbuni e pitroliu, inquina l'aria e fa canciari u Tempu. E una bella cosa chi quannu c'è na disgrazia ni iutamu unu cu n'autru, ma saria cchù giustu chi farissumu respirari megghiu a Nosta Madri Terra.

I nostri vutazioni :

• 10 a Civati picchì dissi chi prisintava a mozioni di siducia pa Cancellieri.
• 5 a Letta chi vidi a ripresa, ci cunsigghiamu di canciari occhiali.

Sant'Agata, New York, brindisi pa vittoria

A zia Adele di novantatri anni non si cuccò propria dda notti, sinn'annoi a fare baldoria 'nta ghiazza a ballari e trincari wine fandanghinu in onori di Bill De Blasiu so niputi ,u novu sinnucu di New York.
Sant'agata diGoti, provincia di Beneventu, si iunciu a Metropoli Americana 'nta festa pa vittoria. A Grandi Mela divintoi na Puma Russa, pi meritu di l'avvocatu Bill. 'Nta capitali du bisinissi vinciu pridicannu a favuri di poviri, di giovini, pi diritti civili e pi l'uguaglianza. U repubblicanu Lotha nisciu cu l'ossa rutti e di pacci du Tea Party s'appunu a mucciari pa viggogna. Appena si sappi a notizia, 'nta Casa Bianca Michelle ittoi un sautu di gioia, ma 'nto preiu  ci nputtiddoi  na moffa a so maritu Obama dicennuci: "u vidisti a to
cumpari Bill? a vo finiri di sicutari sti liberisti repubblicani nto palammentu?"  U novu sinnucu inveci sa gudia supa u palcu di festeggiamenti assemi a so famigghia, a mugghieri Charlaine puitissa e fimminista  d'origini africani,i figghi  Danti u ricciu e a bedda Clara. Stu menzu "comunista" miricanu ci misi na petra supra a Giuliani u "sceriffu" fanaticu e a Bloomberg u capitalista. U so pinseri è pi tanti senza casa, cchiù sai di cinquantamila,pi disoccupati, pi chiddi chia hannu a tirari a campari facennu travagghi a picca soddi e luntanu da casa, pi scoli chi custunu troppu assai, pa finanza chi fa u malu e u bon tempu e paga picca tassi. Pinsannu e discussi chi si fannu nta l'Italia e u nostru govennu di Lagghi Intesi di Giorgi II e u capu squadra Letta, paremu carusi chi vannu all'asilu da politica, mentri l'autri sunnu o liceu. U fattu è cu munnu camina e nui ristammu femmi,
ancora ni scantamu che venunu i comunisti, quannu iddi non ci sunnu cchiù d' un beddu pezzu. L'elezioni di De Blasiu  dimostra puru chi pi vinciri si parra chiara, sinnò si fannu sulu npracchi.

I nostri vutazioni:

• 10 e lodi pu solitu Papa,Franciscu Maravigghia che dissi chi figghi di corrotti manciunu pani sporcu.
• 8  a Accorinti  picchì ristoi sempri u stissu
• Sutta zeru,in quantità non classificabili,a Silviu Bellusconi ,chi paragonoi i so figghi all'ebrei e tempi di Hitler:  Viggogna,Viggogna,Viggogna,Viggogna,e non finiria cchiù.

Cu avi un amicu , avi un tesoru

Savia sbigghiatuiatu all'uritta,quannu sunoi u cellulari ca canzuni
Per un amico in piu',per un amico in più .......    
 "Prontu cu è"      
     "    Sugnu cumpari Sabbaturi, cummari Anna Maria,sulu vui mi putiti iutari.  Di ricchiuni di magistrati mi minteru intra Giulia, a povira me figghia non mancia cchiù e si senti sempri mali, l'avemu a fari nesciri di

da, vui u capiti benissimu, chiddi non su posti pi personi per beni."
    "Cumpari ci pensu io, stati tranquillu."
"Grazi cummari, e tanti saluti a vostru figghiu."
Anna Maria Cancilleri, chi è fimmina, ma pi l'impunenza pari un masculu, fici na para di telefunati, e Giuliedda Ligresti ripigghioi culuri nta facci e ritunnoi 'nto so ambienti naturali. Appena u sappi Travaghiu, chi non si sapi fari i cazzi soi, cumincioi a nciuriari a ministra dicennu , nenti di menu, chi idda l'avia fattu mi si disobbligava di l'assegnu milionariu chi avia ricivuto pa consulenza 'nta l'assicurazioni di Ligresti. Cetti giunnalisti, politici e genti chi ancora ci cridunu all'onori annaru banniannnu peti peti chi  Rosa s'avia dimettiri, picchì avia fattu na particualarità. Ma chisti chi sunnu francisi o nglisi?  Nto nostru paisi s'ha fattu sempre così.

A leggi esisti  sulu pu populu basciu, pi l'autri è tutta n'autra cosa. Iddi vivunu 'nto munnu di personi per beni , hannu i soddi, u poteri, sunnu u cetu iatu. U nostru paisi è u paisi di Bellusconi, u riccu rinnisciutu chi fa tuttu chiddu chi voli, e 'ntoculu a Giustizia.

'Nto nostru paisi a povira genti chi finisci 'nte cacciri, veni trattata comui bestii e senza rispettu e pi stu motivu chiddi chi non resistunu s'ammazzunu, ma nuddu sa bilia o fa na telefunata. Ma idda a fici pi umanità e ci avemu a cridiri. Infatti pi idda e pi tutti chiddi

comu a idda l'umanità è u cetu iatu,tuttu u restu è massa populari.

I nostri vutazioni: 8 a Letta picchì dissi cu populismu è u periculu mumeru unu pa democrazia. e cu ci po dari tortu.

10 a Gasparri picchì è cchiù fedeli d'un cani cu so padruni.

Fimmini o volanti periculu costanti

Si sapi,i fimmini quannu guidunu hannu milli pinseri pa testa: i carusi,i cosi chi

hannu a cattari,u maritu,cetti voti u cumpari e pecciò ca testa 'nta l'aria mestunu e sunnu un

periculu nta strada.

'Nta l’Arabia Saudita sunnu cchiù scattri,ne fannu guidari propria e risovvunu u problema. 

Dà i sceicchi,chi hannu cchiù soddi picchì 'nta campagna hannu i puzzi i pitroliu,

hannu l’harem unni tenunu tanti beddi fimmini e si scialunu cu iddi,

comu fa u nostru Sceccu Silviu,chi voli godiri cchiù sai chi po’, picchì sapi cu spetta u Nfennu. 

(Apri parentisi  'nta l’Arabia magara i babbi ponnu aviri cchù mugghieri. Chiudi parentisi.)

Ma a Najila ci uscioi u st…… e  pinsoi chi Khaled, u re, è un pezzu di m…...

“ Cà l’annu a finiri,iò non aiu bisogno d’un masculu chi mi potta a machina,iò vogghiu nesciri,annari unni vogghiu, annari a scola, vestiri comu vogghiu, fari politica,

annari o barri e puru a discoteca. E vistu ca leggi ni proibisci di guidari, cumpagni fimmini d’Arabia,mintemuni o volanti, e ittamuni a curriri nte stradi e facemuci pigghiari na picca i cacaredda a sti masculi ca babba e senza cuggh..uni”.

Piccatu chi foru picca chiddi chi appunu u curaggiu mi si mentunu contru a polizia,i multi 

e i frustrati.

Ma impottanti chi cuminciaru, cchiù avanti si farannu sempri cchiù ssai.

Tempu ci voli,ma i masculi l'annu a finirinmi sa spassunu cu

quattru mugghieri e i sceicchi mi si cattunu i fimmini comu giocattuli.

I Fimmini c'hannu a passiari davanti ca minigonna e iddi non l'hannu a  tuccari.

C'hannu fari scola, l'hannu a mentiri 'nta casa a fari a cucina e a puliziari 'nda terra.

Nui chi semu “femministi” non capemu,comu nto dumila e tridici,po’esistiri un paisi 

comu l’Arabia Saudita chi ca scaciuna da religioni,teni e fimmini comu e schiavi.

Picchi Obama chi è niru e di origini musulmani non fa nent

E chi era babbu? 'Da c’è u pitroliu e senza oru niru, nenti dollari e nenti sognu miricanu.

I nostri votazioni: Renzi 4 picchì pari chi parra bonu,ma è nu scunchiudutu;

1 a Hollandi picchi ci fici pigghiari o so ministru dell’internu Manuel Valls,

direttamenti di 'nta scola, a carusa zingara Leonarda, e cià fici mannari cu tutta

a so famigghia 'nto Kossovu.

Obama e u Tè amaru comu u zagaru

Ogni annu nta Merica u trenta settembri u Congressu avi approvari u Bilanciu,annunca
Si femma u guvennu e si femmunu magara i soddi.
I cosi cchiù impottanti non si femmunu però.
O Senatu, unni i Democratici hannu a maggioranza,tuttu filoi lisciu,
ma a Camira di Repubblicani si misi 'nto menzu (apri parentisi i
m…… : precisu comu ca! Chiudi parentisi). 
Caderu nto sciut daun,comu u ghiamunu iddi;
l' impiegati si misiru a passiari senza soddi,i nimali 'nte zo ne vadda nuddu,
i quadri nte musei su tutti mpubirazzati e spiramu chi ammenu entru u diciassetti ponnu iazzari u limiti du debitu,sinnò a Merica fallisci,e non
po’ pagari cchiù a nuddu,e addiu betta.Tuttu stu terremotu succedi,picchì
nta Cammira ci sunnu na maniata di pacci chi appattenunu o Pattitu du Tè.
Sti strammati si fannu ghiamari così picchì all’epuca quannu ancora c’erunu 
i coloni,i miricani ittaru a mari i cascitti di tè di 'nglisi,pi curriu conttru
u re o a regina d’Inghilterra  chi ci facia pagari troppu tassi.Ora chisti
l’hannu cu Obama chi ci pari musulmanu e comunista.Ca scaciuni di
l’approvazioni du Bilanciu ci vonnu fari sautari a Rifomma Sanitaria,chi
finalmenti,comu nte  nazioni civili,ci duna a tutti a possibilità di curarisi
i malatii.Iddi ci vonnu fari calari u so Tè,chi è amaru comu u zagaru, accussì
i genti restunu nto menzu a na strada,mentri i strunzi si fanno i ghippi.
Sutta sutta stu pattitu c'è a tutti i banni;si prisentunu ca risatedda, chi prumissi,
palloncini e curiannuli però poi nesciunu i cuteddi di ghiancheri e tagghiunu
a ritta e a manca, picchì su convinti chi a Giustizia appatteni all’anciuleddi
e non è cosa di stu munnu.
I nostri votazioni: Rodotà,u prufissureddu, si merita 7 pi comu difenni a nostra
Costituzioni,
A Barrosu ci damu nu bellu 2 picchì ,mentri vaddava i mutticeddi di
Lampedusa  pinsava sempri a du cazzu i Bilanciu.

Aviunu rruvatu

"Semu vicini,stamu ruvannu,dumamu u focu così ni vidunu e ni venunu
a pigghiari."
Poi du focu si fici troppu ranni.
I migranti si spostarunu 'nto coppu e a baccazza buccau 'e 'nfunnau.
U silenziu du mari si rumpiu;buci,lamenti,mammi chi ghiamaunu i figghi,figghi 
chi ghiamaunu i mammi,patri chi cianciunu e pisci sbarruati.
Du piscaturi,maritu e muggheri,desuru l’allammi e subutu rivaru l'aiuti.
Na picca si savvaru e rrivaru 'nta terra femma,
ma i 'cchiù ssai mureru,centu,ducentu,tricentu,quattrucentu e ci
sunnu ancora chiddi 'nto funnu du mari.
A Sinnaxa cianci lacrimi di sangu pa mala sorti da so Lampedusa chi appi vidiri tuttu
troppu duluri.
L’autru ionnu Papa Franciscu Maravigghia davanti e genti dill'isola
dissi chi sti motti pisunu supra a nostra cuscenza.
Dissi puru ca cuppa è du govennu chi fici cetti leggi.
Iddu no putia diri,ma nenti di stranu chi pinsava a Bossi- Fini.
Sta leggi di “barbari du nord”dici cu povarazzu straneru senza pemmessu 
è un delinquenti,magara chiddi chi si savvaru a Lampedusa e, si c’è cacchidunu
chi i iuta, è peggiu pi d'iddu.
Quannu c’era Basittuni e so cumpari u Pregiudicatu i cosi annaunu ancora 
megghiu: i migranti i mazzava direttamenti 'nta Libia Gheddafi:
occhi non vidi,cori non doli.
A genti si ni scappa di guerri,di torturi,da fami,
da disperazioni e cecca un postu unni putiri campari cu dignità e
daricci un pezzu di pani e so figghi,e nui ni vutamu pi n’autru latu?
Si vulemu stari in paci cu l’autri e ca nostra cuscenza non basta
'cchiù a carità.
Ama dari solidarietà,ama mentiri a disposizioni i nostri cosi.
Passamu e nostri votazioni: Alfanu 6, picchì pa prima vota ci dissi no a
so patrozzu, zero picchì continua a diri chi è innocenti, in tuttu pecciò Alfano: 3.
7 o capu du govennu francisi chi si voli avvidiri subutu cu tutta l'Europa pi parrari
du problema di migranti.

U contropedi di Kaka’

“Iddu” avia cinquantacinqu notti chi non dummia e ci passaunu pa testa
pinseri brutti.Pinsava chi rivava a finiri nte cacciri, unni a genti
ci putia fari i suvizzi,umiliarlu,pigghiarlu pu culu,o,peggiu ancora,pigghiarici u so culu. Si scantava c'avia puliziari i stradi, chi c'avia dari a manciari e vecchi nto spiziu.
Pinsoi magara chi  so figghiozzu Alfanu avissi statu na pasca 'nto
guvennu du Pd,chi a Caffagna sa facia cu Renzi e a Minetti cu
Civati. 
Chi canali 5 divintava a nova televisioni di Di Benedetti e u Milan
cadia 'nte manu di tedeschi.
Pa disperazioni stampoi na littra di dimissioni e cià desi a tutti i so 
cumpari.
Si Lettinu e Gioggiu Secunnu cuntinuanu a fari i scecchi 'nto linzolu e non ci daunu l’agibilità nto Pallamentu, iddi s’aviunu dimettiri subutu
 e a fanculu u govennu di lagghi intesi.
U diritturi Gioggi e u so capu squadra,'ncazzati niri,fimmaru i travagghi e così 
sautoi u bloccu di l’IVA.
"Iddu”,comu si fussi Kakà,cu un contropedi fulminanti  fici
cadiri u govennu,picchì di comunisti du Pd,chi morunu du desideriu
di 'nziccarici i manu 'nte sacchetti dill' italiani,cu na scusa “babba” aviunu
fattu pattiri l’aumentu ill’IVA.
E a “Iddu” ci ritunnoi u sonnu, ripusoi friscu e beatu e 
si 'nsunnoi elezioni,comizi,conferenzi,manifesti di Fozza Italia, IMU+IVA e 
festeggiamenti chi banneri svintulanti.
Gioggiu Secunnu e Lettinu jo condor ristaru ribbamminuti a vaddari i stiddi nto celu 
e a scipparici i fogghi a maggarita:
elezioni si, elezioni no,elezioni si elezioni no.
E  ora comu facemu cu spread,cu L’Europa, ca disoccupazioni, ca leggi
elettorali, ca giustizia,ca genti chi non pò mancu manciari?
U Signuri mi ni pigghia pi capiddi.
I nostri votazioni:
Grillu resta sempri a zeru,cetti voti +,cetti voti-,picchì aspetta ancora u
trenu chi ommai passoi;
Barilla 1  picchì 'nta so pubblicità non voli i ricchiuni;
Dariu Fo 3  picchì no lassoi futtiri.

Puntu e a capu

A stissa libreria. a stissa bannera, a stissa scrivania, u stissu calamaru,

i stissi capiddi, a stissa maschira, a stissa canzuna, Fozza Italia,

u stisu ritunnellu, malanova mi hannu i giudici. Ritunnammu a vint’anni fa,

quann’erumu cchiù figghioli, c’era a Lira, c’erunu i Torri Gemelli,

George Bush era u frati babbu e a Mafia mazzoi Falconi e Borsellinu.

Nto munnu nto frattempu pirò, ci foru guerri, stragi, tsnunami, terremoti,

crisi; passaru, Aznar, Zapatero, Rajoy, Mitterand, Chirac, Sarkozy, Hollande

Bush primu, Clinton, Bush secunnu, Obama, Giovanni Paolu secunnu,

Binidittu sedicesimu, Franciscu primu, e nta l’Italia sempre unu. U Paisi

Du Suli ristoi imbalsamatu, studdutu, mbalbulatu e vuliri d’ un riccu culu rinisciutu
Chistu,chi a tutti i banni u canusciunu pi buffuni e ntrallazzeri,

cianci cu lacrimi, picchì voli ntennniri a diri chi si non era pi magistrati

carogni e comunist e i politici nvidiusi, avissi pututu fari a so rivoluzioni

liberali e l’Italia cu sapi unni avissi rivatu. Ognunu è liberu di pinsari

quali saria stu postu. Ora pirò chi fu cunnanatu smania comu un pacciu

picchì a leggi dici chi un pregiudicatu non po’ rapprisintari u populu.

Ma iddu di sta ricchi non ci senti e  pi menzu di so scribbacchini e

Pinni vinnuti ietta malanova e izza i genti contro i giudici,

Ricatta u prisidenti Gioggi secunnu e teni Lettinu a bagnu maria.

Ristammu tutti middati all’abburu di desideri di un vanitusu

Riccu e arroganti. Pari cu regista chi gira stu film non rinisci a

Truvari na fini e costringi l’attori a ristari supa a scena fina o

Sfinimentu,e puru Donnantoni chi vi sta scrivennu.

Menu mali chi c’è Papa Franciscu Maravigghia, chi nto

Giunnali di Gesuiti,Civiltà Cattolica, cunfissoi di esseri un piccaturi.

A Napulitanu un zero più non ciu leva nuddu,picchì non rinisci

Cchiù a stari ca schina ritta. Fossi è a vicchiaia?

I tribunali chi pidderu a causa

I cammii sunnu chini di scattoffi,di catti bullati, di denunci e

testimonianzi,di rubbatini,'mazzatini,tradimenti,di soddi,

sentimenti,motti e vita.

A Cancilleri,a Tatcher 'cchiù rossa, chi

non cianci mancu quannu ci mori a iatta, fici a leggi pa 

sistemazioni di tribunali.

All’epuca so patrozzu,u 'ngissatu, Monti,

chiddu chi prega Diu e tagghia u prossimu ci avia dittu chi

i spisi da Giustizia   erunu assai e s’avia a dari na sfubbiciata.

Idda,chi non si menti a divisa di carabbineri picchì non ci capi,inveci da

fobbicia pigghioi a 'ccetta e nta quattru e quatrottu cancilloi:

trenta tribunali, ducentuvinti distaccamenti e 

setticentusettanta giudici di paci.

'Nto coppu fici rispammiari ottanta miliuni.

Nu bellu regalu pu minustru Saccu e mani.

E cu si ni futti di l’avvocati,,di l’impiegati,chi hannu a fari u traslocu

nta n’autra cità,di genti chi hannu a fari centinaia di 

chilomitri,pi divozzi,risarcimenti o sulu testimonianzi.

U contadinu  chi avi u vicinu chi ogni vota chi mivira ci robba menzu

metru i terra, o u lassa futtiri o pigghia a scupetta e ci

spara.

Quannu “Iddi” pigghiunu a pinna e fannu i cunti

è sicuru chi cuminunu cazzati.

U ragiunamentu è sempri u stissu;si c’è na scola 

nto pizzu di na muntagna cu sulu deci carusi, non cunveni tenilla apetta.

Però si si chiudi di poviri mammi unni hannu a mannari i figghi a scola?

Diciunu chi cu sti spostamenti ponnu fari tribunali 

specializzati,unu pa mafia,unu pa corruzioni,unu pi 

l’evasioni,uno pi pedofili e i violenzi sessuali.

Ma unu pi conna chi hannu no fannu?

Ci vurria un beddu scioperu generali a tempu indeterminatu e così

videmu sa finisciunu.

Un deci ,unnici,dudici pi Mimmu Quiricu,chi mancu u libiraru 

du rapimentu in Siria ni desi na lezioni di 

umaniyà e giornalismu.

Deci chiù a Papa Franciscu Maravvighia chi offri i cunventi

e rifugiati.

Zeru menu a Violanti chi cianci picchi non si renni cchiù

cuntu di chiddu chi dici.